ਭਵਾਨੀਗੜ (ਗੁਰਵਿੰਦਰ ਸਿੰਘ) ਇੱਥੋਂ ਦੇ ਦੁਕਾਨਦਾਰ ਲਵਪ੍ਰੀਤ ਪੁੱਤਰ ਨਰਾਇਣ ਦਾਸ ਨੇ ਦੋਸ਼ ਲਗਾਇਆ ਕਿ ਉਨ੍ਹਾਂ ਵੱਲੋਂ ਦੋ ਸਾਲ ਪਹਿਲਾਂ ਬਾਜ਼ਾਰ ਵਿੱਚ ਖ਼ਰੀਦੀ ਗਈ ਦੁਕਾਨ ਦੇ ਪੁਰਾਣੇ ਮਾਲਕਾਂ ਵੱਲੋਂ 18 ਦੀ ਰਾਤ ਨੂੰ ਜ਼ਿੰਦਰੇ ਤੋੜੇ ਗਏ।ਅੱਜ ਇੱਥੇ ਪ੍ਰੈਸ ਕਾਨਫਰੰਸ ਦੌਰਾਨ ਦੁਕਾਨਦਾਰ ਲਵਪ੍ਰੀਤ ਨੇ ਦੱਸਿਆ ਕਿ ਉਸ ਨੇ ਦੀਪਕ ਕੁਮਾਰ ਅਰੋੜਾ ਤੋਂ ਦੋ ਸਾਲ ਪਹਿਲਾਂ ਬਾਜ਼ਾਰ ਵਿੱਚ ਇੱਕ ਦੁਕਾਨ 25 ਲੱਖ ਰੁਪਏ ਵਿੱਚ ਖ਼ਰੀਦੀ ਸੀ ਅਤੇ ਦੀਪਕ ਕੁਮਾਰ ਅਰੋੜਾ ਨੇ ਸਵਾ ਦੋ ਸਾਲ ਪਹਿਲਾਂ ਇਹ ਦੁਕਾਨ ਸਚਿਨ ਖੋਸਲਾ ਅਤੇ ਨਿਤਨ ਖੋਸਲਾ ਤੋਂ ਖ਼ਰੀਦੀ ਸੀ। ਉਨ੍ਹਾਂ ਦੱਸਿਆ ਕਿ ਜਦੋਂ ਉਸ ਨੇ ਇਹ ਦੁਕਾਨ ਖ਼ਰੀਦੀ ਸੀ ਤਾਂ ਖੋਸਲਾ ਪਰਿਵਾਰ ਵਾਲਿਆਂ ਨੇ ਦੁਕਾਨ ਤੇ ਆ ਕੇ ਰੌਲਾ ਪਾਇਆ ਤਾਂ ਉਸ ਨੇ ਇਸ ਦੁਕਾਨ ਸਬੰਧੀ ਅਦਾਲਤ ਵਿੱਚ ਕੇਸ ਪਾ ਦਿੱਤਾ ਸੀ,ਜਿਸ ਤੇ ਅਦਾਲਤ ਨੇ ਉਸ ਨੂੰ ਸਟੇਅ ਦੇ ਦਿੱਤੀ ਸੀ। ਪਰ ਹੁਣ 18 ਜੂਨ ਦੀ ਰਾਤ ਨੂੰ ਉਕਤ ਖੋਸਲਾ ਪਰਿਵਾਰ ਵੱਲੋਂ ਇਸ ਦੁਕਾਨ ਦੇ ਜ਼ਿੰਦਰੇ ਤੋੜੇ ਗਏ ਹਨ, ਜੋ ਕਿ ਮਾਣਯੋਗ ਅਦਾਲਤ ਦੇ ਹੁਕਮਾਂ ਦੀ ਉਲੰਘਣਾ ਹੈ।ਉਨ੍ਹਾਂ ਦੱਸਿਆ ਕਿ ਇਸ ਸਬੰਧੀ ਉਨ੍ਹਾਂ ਐਸ ਐਸ ਪੀ ਸੰਗਰੂਰ ਦਫਤਰ ਵਿੱਚ ਸ਼ਿਕਾਇਤ ਲਿਖਾਈ ਗਈ ਹੈ। ਉਨ੍ਹਾਂ ਪ੍ਰਸ਼ਾਸਨ ਤੋਂ ਇਨਸਾਫ ਦੀ ਮੰਗ ਕੀਤੀ।ਇਸ ਮੌਕੇ ਦੀਪਕ ਕੁਮਾਰ ਅਰੋੜਾ ਨੇ ਲਵਪ੍ਰੀਤ ਨੂੰ ਦੁਕਾਨ ਵੇਚਣ ਦੀ ਪੁਸ਼ਟੀ ਕੀਤੀ ਗਈ।ਇਸ ਸਬੰਧੀ ਥਾਣਾ ਮੁਖੀ ਇੰਸਪੈਕਟਰ ਮਾਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਸ਼ਿਕਾਇਤ ਪਹੁੰਚ ਗਈ ਹੈ। ਪੁਲੀਸ ਇਸ ਸਬੰਧੀ ਬਣਦੀ ਕਾਨੂੰਨੀ ਕਾਰਵਾਈ ਕਰ ਰਹੀ ਹੈ।